१२ भदौ,
लुम्बिनी प्रदेश सरकारले रसुवालगायतका जिल्लामा आएको बाढीपहिरोबाट प्रभावित नागरिकको राहत तथा उद्धारका लागि प्रधानमन्त्री दैवीप्रकोप उद्धार कोषमा ३ करोड रुपैयाँ सहयोग उपलब्ध गराउने निर्णय गरेको छ।
प्रदेशका मुख्यमन्त्री चेतनारायण आचार्यले प्रदेश सरकारको तर्फबाट विपद् प्रभावित नागरिकका लागि प्रधानमन्त्री दैवीप्रकोप उद्धार कोषमा उक्त रकम सहयोग गरिने जानकारी दिनुभयो।
यसैगरी, लुम्बिनी प्रदेशभित्र स्थायी रूपमा बसोबास गर्ने नागरिक विपद्मा परी मृत्यु भएमा उनीहरूका परिवारलाई प्रतिव्यक्ति एक लाख रुपैयाँका दरले राहत रकम उपलब्ध गराइने व्यवस्था मिलाइएको छ।
मुख्यमन्त्री आचार्यले विपद्का समयमा प्रदेशभित्रका उद्योगी–व्यवसायी, राजनीतिक दल, नागरिक समाज, राष्ट्रसेवक, सामाजिक संघसंस्था, सञ्चारकर्मी तथा आम नागरिकलाई आ आफ्नो ठाउँबाट राहत तथा सहयोग उपलब्ध गराउन अपिल गर्नुभएको छ।
यसैबीच, रसुवा बाढीपछि लुम्बिनी प्रदेशका १८१ जना व्यक्ति अझै सम्पर्कविहीन रहेको सरकारका प्रवक्ता तथा सामाजिक विकासमन्त्री रामजीप्रसाद घिमिरेले बताउनुभयो। प्रदेश सरकारले जिल्ला प्रशासन कार्यालय, स्थानीय तह तथा सुरक्षा निकायसँग समन्वय गरी सम्पर्कविहीन नागरिकको खोजी तथा उद्धारका लागि सक्रिय पहल गरिरहेको जनाइएको छ।
त्यस्तै, नदीमा बगेर लुम्बिनी प्रदेशको पश्चिम नवलपरासीमा आएका शवको व्यवस्थापनमा समेत प्रदेश सरकारले आवश्यक भूमिका निर्वाह गरिरहेको छ।





