कोहलपुर नगरपालिका वडा नं. ११ स्थित क्रिकेट मैदान क्षेत्रमा रहेका अतिक्रमित संरचना हटाउने प्रक्रिया अघि बढेसँगै अब वडा नं. २ को आनन्दनगरस्थित प्लट नं. १८ मा बनेका संरचनाहरू पनि चर्चाको केन्द्रमा आएका छन् ।
वडा नं. २ कार्यालयले नगरपालिकालाई पत्राचार गर्दै उक्त जग्गा सार्वजनिक तथा स्थानीय सरकारको मातहतमा रहेको उल्लेख गरेको छ । साथै, त्यहाँ थप संरचना निर्माण नगर्न र भइरहेको अतिक्रमण रोक्न आवश्यक पहल गर्न आग्रह गरिएको छ ।
वडा कार्यालयद्वारा पठाइएको पत्रमा जिल्ला समिति बाँकेको निर्णय, सर्वदलीय बैठकको निष्कर्ष तथा भूमि आयोगले माग गरेका विवरणसम्बन्धी प्रतिवेदनसमेत समावेश गरिएको छ । पत्रअनुसार उक्त क्षेत्र सार्वजनिक प्रयोजनका लागि छुट्याइएको जग्गा रहेको जनाइएको छ ।
यसअघि २०७९ सालमा बसेको सर्वदलीय बैठकले समेत उक्त सार्वजनिक जग्गामा अनधिकृत बसोबास तथा नयाँ संरचना निर्माण रोक्न निर्णय गरेको थियो । पटक–पटक सूचना जारी गर्दा पनि अतिक्रमण जारी रहेको वडा अध्यक्ष हरि कठायतको भनाइ छ ।
क्रिकेट मैदान क्षेत्रमा डोजर चलाएर संरचना हटाउने काम सुरु भएपछि अब आनन्दनगर क्षेत्रमा रहेका संरचनामाथि पनि नगरपालिकाले कदम चाल्ने हो कि भन्ने चासो बढेको छ । वर्षौंदेखि बसोबास गर्दै आएका केही परिवार विस्थापनको चिन्तामा छन् भने स्थानीय सरकार सार्वजनिक सम्पत्ति संरक्षण आफ्नो दायित्व भएको बताइरहेको छ ।
प्रतिक्रिया
सम्बन्धित खवर